Chief Minister Lalduhoma chuan, “India ramah hian 1927-ah Indian Forest Act kan nei a, Bristish ho min siamsak a ni. British ho chu India ramah sumdawng  turin an lo lut a, an duh ber chu India thau sawh a ni. India mipui tan leh tribal-te tan he Forest Act hi a tha vak lo a ni. India a Independent a, keimahni kutchhuak ngei Dan siam a ni a,  Conservation of Forest Act hi India sorkarin a siam ve ta a ni. Conservation tih chu JF Dictionary-ah chuan humna tiin a ziak a, Forest humna a nih chu. Dan tha zawk India sorkarin a rawn siam chu Mizoramah pawh UT kan nih atangin chhum lo chat lovin kan lo hmang char char tawh a ni. He Dan hi TN Godavarman chuan 1996-ah Supreme Court-ah a khing ta a, Supreme Court thu tluknaah chuan Community Forest te, Private ram te, Sorkar ram te, Revenue ram te pawh a vaiin he case hnuaiah chuan Forest tih a lo ni ta a ni. Lal lai ata tawh khawtinin Village Safety Reserve-te kan nei thin a, YMA-te pawhin ram humhalh te kan nei thin a, khawi khua emawin an khaw himna reserve area-ah an khaw zauhna tur emaw hmasawnna thil dah turte lo awm ta se Godavarman case-ah chuan clearance lak a ngai zel a ni," a ti a.

"Kan sorkar hnuah pawh buaina lian tak kan tawk a, sorkar hmasaten clearance an tih fel loh Lengpui a NIT chungchangah cheng vaibelchhe 20 chawi turin min ti a, kan mangang lutukin central-ah kan kal a, nasa takin kan ngen a. A vaiin min ngaidam lo mahse tam tak min ngaidam a, tunah chuan hna an tan leh tawh a ni. Kan ramah hian Inner Line Forest Reserve leh Riverine Forest Reseve kan nei a, Forest ram chhungah khua te a awm a, Leilet leh Huan tamtak a awm. Congress sorkarin NLUP an kal pui laia mi tamtak Forest  Area -a ram an lo pek te kha Godavarman case-ah hi chuan in nei thei tawh lo rawn ti ta se a buai vek thei dawn a ni. Tunah hian Handholding Scheme hnuaiah Zau Policy kan han kal pui ta a, Chief Minister Rubber Mission hnuaiah Rubber chin te, Kuhva te, Oil Palm-te pawh lo ching dawn ta i la clearance min pek loh chuan thiltih a harsa leh vek dawn a ni. 

"Mizoram tana tha tur India leh khawvel huap pawha Company tha te rawn inbunna tur Investment Policy thar Special Investment Zone (SIZ) tunah hian kan duang a, ram leh kawng atan clearance min pek theih loh chuan hei pawh hi a hlawhtling thei dawn lo a ni. Tunah pawh a taka buaina kan tawn chu Tualpui leh Aiduzawl inkar kawng awm sa laih zau tum a ni a, Murlen Sanctuary atangin buffer zone-ah 10km huam chhungah a awm an tih avangin laih zauh theih a ni lo. Champhai atangin laih tura ruahman a ngaih phah a ni. Brahmaputra Board nen Mat Irrigation Project cheng 177 Vbch. senna tur kan buai mek a, Leilet nei ten tui an hnianghnarna tur leh Mat khuapa Thenzawl chawmna tur a ni a, hei pawh hi clearance min pek theih loh chuan a hlawhchham leh dawn a ni. Vairengte leh Sairang inkar kawng Four Lane- a laih tur, a huna laih tan theih loh chhan pawh hi Forest clearance kan hmuh har vang a ni.  Delhi-ah meeting kan nei a, MoRTH Minister hnenah kan ngen a, Compensate hi Forest leh mimalin an la kawp thei hlauh a, hna an tan thei a ni. Chuvang chuan Godavarman case hi Central sorkar pawhin hnawksak an ti a, Dan thar Conservation of Amendment Act 2023 hi an siam ta a ni. MNF sorkar lai a ni a, Guideline leh Rules te kan la hmu bawk si lova, a Dan ringawt han thlir khan kan inhlauh siak ta a, a pawi ang tiin zir chianna a la awm lo nen resolution te passed-in kan do a nih kha. Amaherawh chu Guideline-te a rawn chhuak a, kan han zirchiang a, he Dan hi kan mamawh zawk niin kan hria a, House-ah lungrual takin kan passed a nih kha. Assembly Speaker-in ‘Remti lo in awm em?’ a tih khan tumahin ‘remti lo’ ti an awm loh avangin dawhkan beng chungin kan passed ta a ni," a ti bawk.

 

Chief Minister chuan, “He Dan kan hlauh chhan ber hi eng nge ni kan tih chuan International border tanga 100 Km. huam chhunga Forest clearance lak harsa lutuk hi a awm tawh tur a ni lo tih a ni a. 100Km bialah hian a vaiin exemption an pe ngawt lova, Linear Project an tih heng Kawngpui te, Rel kawng te, Gas & Oil Pipeline te, Power Transmission line leh Strategic Security and Public Utility vantlangin an mamawh thil te a ni. Hengah hian hma an la a nih pawhin an hnathawhna chin bak kha ram pek an ngai lova, khing hmalakna te khi en i la mipuiten nitina kan chhawr leh kan mamawh ngawih ngawih an ni. Silsury atangin Bangladesh panna tur inkar kawng laih kan tum a, Dampa Sanctuary atangin buffer zone-ah 10Km huam chhungah a awm tiin clearance min pe duh lova, amaherawh chu Central sorkarah he Amendment hmang hian Linear Project-ah min dah sak rawh u tiin kan zuk thlena min pawmpui tawh a ni. Hemi rual hian kawngpui pasarih, FCAA hmangin Linear Project-ah min puan sak rawh u kan ti a min phal sak tawh bawk a ni. 

Tripura atangin IGGL-ten Mamit District atangin Gas Pipeline an rawn phum mek a, hna a muang hle a ni. Prime Minister nen kan inhmuh hnuhnung berah khan sawi chhuah a ni a, Forest Clearance vel fel loh avanga hna muang hi a vei hle a, a lehkha ngeiin bawhzui turin min ti a, hna pawh a kal leh thei tawh a ni. Indo a thleng lo a nih chuan he Danin a phalsak china hmasawnna hnathawh te hi a chhawrtu tak tak tur chu mipuite kan ni a, Indo a lo thleng palh ta a nih pawhin emergency an puang ang a, an duh duhin an ti danglam dawn tho a ni. Rare Earth chungchangah pawh Ministry of Mines-te nen 28th August-ah khan meeting kan nei a, Burma ramriah khian a awm ve mai thei tiin kan sawiho a ni. Keimahni zawkin hma rawn la chak thei u la, explore vat vat i la tih hi kan duhthusam zuk thlen a ni. An rawn zawng ang a, Lisence fees an chawi ang a, mimal ram te a nih chuan compensate an pe ang. Mi thenkhatte thil sawi duh dan hi chu a ni lo a ni. State list entry 23-ah hian a inziak vek a, kan ta a ni a, kan thu neihna a ni. ‘Mineral Exploration Trust Rules’ 2025 pawh kan duang fel tawh a ni. He kan Dan siam hnuaiah hian tute pawhin hna an thawk dawn a, min ti chhe dawn a ni lova kan hlawkna tur zawk a ni. 

He Amentmend hian State sorkar thuneihna sang zawk min pe ta a, kan ram chhungah tu pawhin thil rawn ti dawn se State sorkar rawnin tih vek a ni. Central sorkar kan ngai sual lutuk hi a dik lo, a pawng a taka min tihchhiat tuma hma la tur anga kan sawi te hi a dik lo, kan ram thatna tur zawka ruahman a ni. Kum 2009-ah Congress sorkarin Forest Right Act an adopt a, kum 2019-ah MNF sorkarin duh lovin an hmang lova,  Forest area- a Tribal chengte humhalhna Dan a ni a, nikum June 18-ah khan ZPM sorkarin kan ti nung leh a ni. FCAA hian he Forest Right Act hi a rawn ti chak sawt bawk a ni. Kan hnam hian himna chi 5 kan nei a, Bengal Eastern Frontier Regulation hi British ho siam kha a ni a, Mizoram state kan nih khan Mizoram State Act, section 43 naah khan he Dan hi hman chhunzawm zel turin a chuang a ni. Paragraph 7-naah chuan, ‘A ram neitu ni lo chuan engmah an nei thiang lovang’ tih a awm a ni. State sorkar in phalna kan pek loh chuan BEFR 1873 hian min hum tlat a, hemi hnuaiah hian Inner line Permit pawh kan la issue reng a ni. India constitution-a 7 Schedule State list entry 18 leh 23 naah hian leilung hausakna chungchanga kan himna min pe a ni. Article 371 G-ah pawh kan himna a awm bawk. Kan ram tana tha lo tur leh hlauhawm tur chu ZPM party leh a sorkarna fawng chelh tute hian kan ti hauh lovang tih ring ngam ang u, hlauh kan inzirtir nasa lutuk hi a pawi em em a, hlauh tur dik tak Pathian hi i hlau ber ang u,’ a ti.